Қазақстанда алдыңғы қатарлы тізе буынын жасанды интеллект көмегімен ауыстыру және кардиостимуляторларды имплантациялаудан бастап күрделі онкологиялық процедураларға дейін жоғары технологиялық операциялар жасалып жатыр. Біз 2024 жылдың қазан айында МӘМС қаражаты есебінен жасалған қымбат әрі бірегей 10 операцияны жинадық. 1. Алматыда жасанды интеллекттің қатысуымен бірегей операция жасалды
10 жыл бойы деформациялаушы гонартроздан зардап шеккен 58 жастағы науқасқа роботтандырылған көмекші арқылы тізе буыны сәтті ауыстырылды. Жасанды интеллект барлығын өлшемі, вальгус бұрышы және деформацияның толық есебімен есептеп шығарды. Дәрігерлердің айтуынша, шағын кесу технологиясы сауығу процесін жылдамдатып, ауырсынуды азайтады. №4 қалалық аурухана хирургтері осындай операцияларды МӘМС аясында тегін жасайды.
2. Маңғыстау облысында жүкті әйелге сәтті операция жасалды
Маңғыстау облыстық көпбейінді ауруханасында гидронефрозбен ауырған жүкті әйелдің іштегі сәбиіне зиян келтірмей, тастары алынып тасталды.
- Егер операция жасалмағанда, бұл науқас пен баласының денсаулығына әрі өміріне қауіп төнер еді, - деді урология бөлімінің меңгерушісі Мұрат Бекқожин.
Оның айтуынша, мұндай операциялар қазіргі уақытта лазермен тастарды ұсақтау әдісі арқылы жүргізіледі. 3. Павлодарда жол-көлік апатына түскен жасөспірімге күрделі операция жасалды
16 жастағы жасөспірім мопед апатынан кейін ми шайқалу, иық сүйегінің сынуы, жамбас сүйегінің төменгі үштен бір бөлігінде көп сынған жарақаттармен ауруханаға түсті. Оған құны 500 мың теңге тұратын операция МӘМС қаражаты есебінен жасалды. Дәрігерлердің айтуынша, толық қалпына келтіру шамамен бір жылға созылады, бірақ тізесі жұмыс істейтін болады. Бір жарым айдан кейін гипс алынып, жақын арада жағдайы жақсарады деп күтілуде. 4. Қарағандыда науқастың қуықтағы тастары алынды
Қарағанды облыстық ауруханасында урологтар науқастың қуықтағы 14 тасын және үлкейген қуық асты безін алып тастады. Айта кетерлігі, тастардың ең үлкені 3 см-ге жетеді. Операция аз инвазиялық әдіспен жүргізілді. Бұл әдісте тастар ұсақ бөлшектерге ұсақталып, кейін алынып, ауыр жарақаттанудың алдын алады. Сәтті операциядан кейін қалыпты зәр шығару қалпына келтірілді. 5. Дәрігерлер механикалық сары ауруы бар науқастың қатерлі ісігін сәтті алып тастады
Екібастұз қаласының тұрғыны механикалық сары ауру белгілерімен ауруханаға түсті. Дәрігерлер өт шығару жолдарының ісікпен жабылғанын анықтады. Алдымен өттің өтуін жақсарту үшін дренаждау жасалып, кейін елордадан келген онкологтардың қатысуымен күрделі панкреатодуоденальды резекция жасалды. Жоғары күрделілігіне қарамастан, операция асқынусыз өтті. 6. Солтүстік Қазақстан облысында жол-көлік апатынан ауыр жарақат алған балаға операция жасалды
Бала облыстық балалар ауруханасына «сүйек сынықтары ығысып, екі балтыр сүйегінің ашық көп сынықты сынуы» диагнозымен түсті. Дәрігерлер титанды икемді стерженьдерді қолданып, остеосинтез әдісімен операция жасады. Металл құрылымдар аз тілік арқылы сүйек өзегіне енгізілді. Операция 40 минутқа созылды. Мұндай операциялар солтүстікқазақстандық балаларға МӘМС аясында тегін жасалады. 7. Талдықорған тұрғынының бүйрегіндегі ісік ағзаны сақтай отырып алынды
Облыстық көпбейінді клиникада «Онкоурология 2024» конференциясы аясында бүйрек ісігі диагнозымен әйелге жоғары технологиялық операция жасалды. Лапароскопиялық резекция 3 см ісікті алып тастап, сау тіндерді сақтап қалуға мүмкіндік берді. 39 жастағы науқас тез сауығып келеді. Операциядан кейінгі күні-ақ тұрып, жүре алды.  8. Ұлытау облысында лапароскопиялық нефропексия бойынша алғашқы шеберлік сабағы өткізілді
Дәрігер Еркебұлан Асамиданов аймақ урологтарына бүйректі бекітудің инновациялық техникасын, торды және аз кесулерді қолданып, көрсетті. Іштің алдыңғы қабырғасына үш кішкентай тілік арқылы бүйрек табиғи орнына қайта орналастырылды. Науқастың бүйрегі кіші жамбасында орналасқандықтан, ауырсыну мен жайсыздық тудырған. Шеберлік сабағы МӘМС аясында өткізілді. 9. Шымкент дәрігерлері бүйрек тастарын инновациялық жолмен емдеуді ұсынады
Шымкент қалалық №1 ауруханасының дәрігерлері бүйрек тастарын алып тастау үшін «Compact Sigma» литотриптерін пайдаланып, науқастардың қалыпты өміріне тезірек оралуына көмектеседі. Жақында олар ауыр жағдайда жеткізілген науқасты құтқарды. Мамандардың айтуынша, қашықтықтан соққы толқынымен литотрипсия жасау арқылы тастарды ыдыратып, оларды табиғи жолмен шығаруға мүмкіндік береді. Процедура ауыртпалықсыз өтеді және сауығу мерзімін айтарлықтай қысқартады, науқастар ауруханадан 1-2 күнде шығады. 10. Польша профессоры қазақстандық дәрігерлерді кардиостимуляторды имплантациялаудың заманауи технологиясына үйретті
Павлодар кардиоорталығында шетелдік хирург Яцек Гаектің жіті қадағалауымен МӘМС аясында төрт науқасқа операция жасалды. Жаңа әдіс жүрек қызметін физиологиялық тұрғыда ынталандырып, оның жиырылуын жақсартады және қауіптерді азайтады. Павлодар дәрігерлері бұл технологияны кеңінен енгізіп, барлық науқастарға қолдануды жоспарлап отыр. Мамандардың айтуынша, кардиостимуляторлар 14 жылға дейін жұмыс істейді, содан кейін батареясын ауыстыру қажет.